فترة الخطوبة من معلومة

النص الحلو..والنص التاني: الخطوبة

سؤال اليوم

ماهى البروستاتا؟ واين توجد ؟

هى جزء هام من الجهاز التناسلي للرجل وتوجد عند الذكر فقط وهى غده فى شكل وحجم ثمره "الجوز" أو "عين... المزيد

بقلم مي الحسيني

دايماً بنسمع من المتجوزين جملة “الخطوبة دي كانت أحلى أيام”، والحقيقة هما بيكونوا دايماً صادقين في إحساسهم ده، لكن ده مش معناه إن الفترة دي كلها ضحك ولعب وجد وحب… لاااااا خالص وإطلاقاً وبتاتاَ.

فترة الخطوبة فترة مهمة جداً في حياة أي اتنين قرروا انهم يتجوزوا وناويين- بشكل مبدئي أو نهائي- يكملوا الفترة الجاية من حياتهم مع بعض، وبتحقق لهم عدد من الأهداف:

1- انهم يتعرفوا علي بعض أكتر، خاصة لو كانت جوازة صالونات، أو كانوا يعرفوا بعض من فترة مش كبيرة.

2- إنهم يجهزوا عش الزوجية.

3- سواء كانوا يعرفوا بعض من زمان أو قريب، تجهيزات الجواز والارتباط الرسمي بيظهر جوانب جديدة في شخصية كل طرف فيهم، يمكن مجتش فرصة إنها تظهر قبل كده، زي مثلاً العصبية الزائدة، المرونة أو عدمها، القدرة على تحمل الضغوط والمسئوليات.. إلخ

4- إن كل واحد فيهم يتعرف على أسرة التاني وعيلته.

في طريق تحقيق كل الأهداف دي، فترة الخطوبة مش دايماً بتكون وردية ومليانة مفاجآت ودباديب وكده، ساعات كتير كمان بيكون فيها مشاحنات وخناقات وسوء تفاهم ولحظات حرجة مع الأهل ومشكلات في التشطيبات والجهاز وغيرها.

كمان ساعات أغلب المشاكل رغم اختلاف طبيعتها بتحصل نتيجة عنصر مشترك هو “التوقعات المتعلقة بالخطوبة” واللي كتير بتكون مش واقعية، وبالتالي بيبدأ كل طرف يكون ليه “متطلبات” لا تتناسب مع طبيعة المرحلة، فنلاقي مثلاً:
العروسة
العريس
منتظرة هدايا كتير. مع الضغوط المالية ممكن ميكونش معاه فلوس للهدايا الكتير.
عاوزة تخرج كتير. مع الشغل الكتير عشان مصاريف الجواز ومشاوير الجهاز، معندوش وقت لأي حاجة.
عاوزة رومانسية وكلام حب. شايف ان الحب أفعال.. وهو يعني بيعمل كل ده ليه.. أكيد عشان بيحبها.
بتفكر في الفرح والفستان. بيفكر في تكاليف الفرح وتشطيب الشقة والجهاز.
بتدقق في أدق التفاصيل، وفي ذوق كل قطعة من الأثاث ولونها وشكلها.. إلخ تفكيره في العفش وكل التفاصيل المتعلقة بالبيت بتنحصر في انها تكون: “مريحة” و”سعرها مناسب”.
طيب نعمل إيه؟

1- حاولوا تحطوا دايما نفسكم مكان بعض، وتتخيلوا لو الأماكن اتبدلت هيكون تفكيركم ازاي، وحطوا ده في حسابكم دايما في تصرفاتكم ومتطلباتكم.

2- قدروا ظروف بعض.

3- إفهموا بعض وتقبلوا النواقص في علاقتكم، لإن مفيش حاجة في الدنيا كاملة، لكن المهم احنا نقدر نقبل إيه ونتخلى عن إيه.

4- تقبلوا الاختلافات الطبيعية بينكم.

5- إفهموا طبيعة المرحلة اللي بتمروا بيها كويس وتعاملوا معاها بوعي وواقعية.

من ناحية تانية فيه حاجات مهمة جداً لازم تستحوذ على تركيزكم وتناقشوها بوضوح خلال فترة الخطوبة، أهمها:

1- مواقفكم الحقيقية من الأمور المهمة في الحياة: يعني مثلاً درجة الانفتاح أو المحافظة، التدين، مدى الارتباط بالأسرة والعائلة، المواقف السياسية، الطموحات والتطلعات المستقبلية..إلخ.

2- طبيعة أو شكل العلاقة بينكم: حدودها، إيه المقبول وإيه لأ، إيه هي الخطوط الحمرا لكل واحد فيكم، هل فيه طرف متحكم في التاني وهل ده مقبول، الغيرة، التسلط.. إلخ.

3- طباع كل واحد منكم وعاداته وتفضيلاته الشخصية: لإنكم هتقضوا جزء كبير من حياتكم سوا، والتفاصيل بتفرق في الحالة دي. مش مقصود إن طباعكم لازم تكون واحدة في كل حاجة، لكن لازم تكون متوافقة وتكونوا متأقلمين مع اختلافاتكم مش قابلينها على مضض وعلى أمل إن الطرف التاني هتغير لأي سبب من الأسباب، لإن ده مش دايما بيحصل.

4- الأهل من الناحيتين: مدى توافقك مع أسرة الطرف التاني، مدى تدخلهم في تفاصيل حياتكم، العلاقة بين أسركم.. إلخ.

5- المواقف الحياتية العامة للطرف الآخر: إزاي بيتصرف مع الناس اللي حواليه، بيكدب؟ ملتزم؟ عصبي؟، إيه مدى اهتمامه بشغله ومستقبله، هل بيتحمل مسئوليات مع عيلته ولا منفض؟

كتير من الناس مش بيكونوا صريحين في تصرفاتهم وكلامهم مع الطرف التاني في فترة الخطوبة، وبيحاولوا يظهروا بمظهر غير حقيقتهم.. بيمثلوا يعني.. عشان يكسبوا الطرف التاني، لكن ده كله بيتبخر بعد الجواز طبعاً.. عشان كده مهم اننا نشوف الشخص اللي هنرتبط بيه بيتصرف إزاي مع الناس اللي حواليه والموضوعات المهمة في حياته، مش معانا احنا بس، عشان نقدر نعرف شخصيته الحقيقية.

الكلمات المتعلقة: , , , , ,
عدد المشاهدات: 2,940