النص الحلو والنص التاني: الغضبالنص الحلو والنص التاني: الغضب

النص الحلو والنص التاني: الغضب

سؤال اليوم

ماهى البروستاتا؟ واين توجد ؟

هى جزء هام من الجهاز التناسلي للرجل وتوجد عند الذكر فقط وهى غده فى شكل وحجم ثمره "الجوز" أو "عين... المزيد

بقلم مي الحسيني

الناس بشكل عام بتختلف في طريقتها في التعبير عن الضيق والزعل والغضب..فنلاقي ناس مثلاً بتاخد جنب ومتتكلمش.. وناس بتنفس عن اللي جواها بالكلام ف ساعتها.. وناس بتزعق وناس بتكسر اي حاجة موجودة قدامها.. وناس بتسعى للانتقام… وغيرها كتير من ردود الأفعال على مواقف سخيفة أو مستفزة.

ومن أشهر المشاهد شبه اليومية في كل بيت في العالم:

هي: حبيبي..مالك؟

هو: مفيش

هي: في حاجة مضيقاك؟

هو: لأ

هي: أمال مالك؟

هو: مفيش!!!!

“هو” مش بيكون مخبي عليها حاجة زي ما “هي” فاكرة، ولا “هي” زنانة زي ما “هو” فاكر.
الحقيقة إن كل واحد منهم ليه طريقته الخاصة في التعبير عن غضبه أو زعله، وده اللي بيأكدوا معظم علماء النفس، وده نتيجة عوامل مختلفة أهمها:
1- التنشئة الاجتماعية:

الرجال من صغرهم بيتربوا على إنهم عيب يبكوا، وان العياط للبنات، وكمان بنلاقي الأولاد في المدرسة بيتم تشجيعهم دايما انهم يعبروا عن غضبهم، ياخدوا حقهم بدراعهم وإلا الناس تستهزأ بيهم ومحدش يعملهم حساب. على الناحية التانية، دايما بتتم تربية البنات على إن التعبير عن الغضب بالزعيق أو العصبية أو غيرها من المظاهر الخارجية ضد الأنوثة، وإنها لازم تتحكم في غضبها وتعبر عنه شفوياً بس وباسلوب مهذب.

بمعني تاني معظم المجتمعات- وخاصة ذات الثقافة الذكورية- بتبص للتعبير الجسدي أو القاسي عن الغضب على إنه “رجولة”، ولكتمانه أو عدم التعبير عنه بشكل عنيف على إنه “شغل ستات” أو “قلة رجولة” او “نعومة”.

2- اختلافات فسيولوجية:

فرغم إن نفس المجموعة من الخلايا العصبية هي اللي بتتحكم في التعبير عن الخوف والغضب عند الستات والرجالة، إلا إن الخلايا دي بترتبط بأماكن مختلفة عند كل نوع منهم. عند الإناث، الخلايا دي بترتبط بعناصر داخلية في جسمهم زي الهرمونات والجهاز التنفسي وضغط الدم، لكن عند الرجال، بترتبط بعناصر خارجية زي الرؤية والحركة.

3- الاختلافات الطبيعية بين البشر:

واللي بتخلي استجاباتهم للمواقف المختلفة غير بعضهم، سواء كانوا رجالة أو ستات، واللي بيكون جزء كبير منها برضه راجع للتنشئة الاجتماعية والخبرة الحياتية لكل واحد فيهم.

أبرز اختلافات التعبير عن الضيق والغضب بين النوعين

anger

لو قدرنا نستوعب الاختلافات الشخصية والنوعية بينا وبين بعض، هنوفر على بعض كتير من المشاحنات والخناقات وفترات الزعل وهنفهم النص التاني بشكل أكبر وهتكون علاقتنا بيه أحسن.

الكلمات المتعلقة: , , , ,
عدد المشاهدات: 1,336